ههههههههه, خش ولا تفطس من الضحك,, العيارة والذبات على اهل المنتدى لايكون اسمك فيهم..

سلام الهي ورحمة ربي

كيفكم..

ذي مشاركتي
المتواضعة,,
عساها تعجبكم,وتضحكم, وهي سلسلة,,
ما هي سلسلة جبال,, سلسلة حلقااات,
ان جازت لكم ذي كملت الباقي لكم
وقضيت على بقية الاعضااء
ناوووي على نص نص, ووحده بايعتها,
وشخصيات كثيرة,, اتركها في المرات الجاااية
ان احيانا ربنا..

مجنون تفحيط
1-البطاقة الشخصية:-
الاسم: -
مجنونوه بن فتح الدولاب سر الختم,
اسم سوداني ذا,
مجنونوه بن -وهيل وقهوة- فتح الودلاب,
وش يبي بالدولاب يفتحه,
العمر: -
جاء للدنيا سنة ابوه يتخرج
من صف سادس مسح الامية.
الميلاد: -
ولد في زقاق من زقاقات منفوحة العريضة.
الطول: -
لم يستخدم متراً لقياس نفسه,
لكنه يعرف انه اقصر من أخوه,
فحين يلبس سروال أخوه يكون
الصروال طويلاً عليه.
الوزن: -
صفر, هذه نتيجة الميزان التي ظهرت
له قبل ان يتحطم, في وجهه.
دووووبا يعني !.

الموصفات والمعايير القياسية
( مواصفات الخشة فول ابوشن),,
او ( عدس ابوشن) كله واحد.

الأنف : -
عسكريمي الشكل..يعني خشمه مخروطي
مثل الايسكريم.ومطرفش ومفرطش.
ينعن ام الوصف, مقدمة خشمه تقل ططسن مطيحه.
لونه,وش اقول مخلوط,( طلع بخووور عجايز),,
مخلوط بين الاحمر والقرمزاني..
ارنبة خشمه محمرة,,,
ارنبه خشمه والعهدة على الراوي ابو قطيوووة صفح الله عنه…
يقولون اطلق عليها قصيمي النار فارداها طريحة
قصيمي يسمع بالقنص والارانب…
يحسب كل ارنبه تنصااااد,
عاد والله مدري اطلاق النار صار بطلقة ساكتوون,,
والا بنبيطة..
<--- يسمع ان النبيطة سلاح فتاك.
المناخر واسعة تقل شكامين اير باص,,
بس مناخر اخوه اشوى شوي
تقل شكامين لومينا اس اس.
على فكرة اخوووه,, سلمت عليه( بسته على خده)
جااااااني منه ثالول في برطمي,,,
خساااارة لو طلع الثالول تحت البراطم,
كان احسن,, منشااان اصير مثل مادلين طبل..
مدري مغازلين طبر… الفنانة الحلوووة..
<--- يحسب الثالول للحلوين مثل الشاامة.,
خشم مجنونوه متفلطح ومتفرطش,,
وملعوباً في حسبته , تقل هضبة طويق.
الجبهة:-
جبهة مجنونوه متراميه الاطراف..
على شارعين.
<--- متاثر بشريطية الاراضي…
لا تفكروني البس صروال قصير مثلهم..
خخخخخ, قلت الصراويل الطووال عاد,
جبهته متراميه الاطراف واصلتها كافة الخدماااات,
باقي متاثر بشريطية الاراااضي..
واصله الخدمات بما فيها حبوب شباب تقبع فوق حاجبة الايمن..
الحاجب الايسر ما هو فيه,, مزيلته البلدية
منشان حفريات الصرف الصحي.. خخخخ ,
<-- قلب على البلدية….
على طاري الحواجب.. وانت تناظر بحواجبه
كأنك تشوف خطوط كفرات ميشلان,,,
ينعن ام الووصف..
<--- يبي يقول لكم انه شاري كفرات ميشلان لسيكله..
حشاااا نصاب ولا يعرف ينصب..
عاد نرجع لجبهة الرجال,,,
الرجال يملك جبهة مترامية الاطراف والارجل,
تقل دكة,,( الدكة جلسة يصلحهونها شريطية االغنمات امام شبوك غنماتهم)
ماسكة معي الليلة على الشريطية..
بس عاد جبهته اكبر من الدكة..
واذا كان خشمه هضبة نجد
اكيد جبهته هضبة التبت..
افلقوني بقوطي صلصة السعودية
اذا شفتوا هضبة التبت من قبل..
البراطم:-
البراطم متهدله تقل ديود البقرة لابش كيري..
ومن بعيد لا شفتها تحسبها صبورة….
اخوووه ابو مناخر لومينا اس اس…
مسكت معه الا يكتب ذكرياته..
ما لقى الا جدار.. قصدي براطم مجنونوه..
وكتب عليها يحيا الهلال يسقط النصر..
يعيش الاتحاد ويموت الاهلي..
اذا كان الحب جريمة فانا اول حونشية الحب..
( ينعن ام الذكريات اللى مثل كذا)..
لا وكاتب بعد ذكريات فتى الصندقة المهجورة.
يحيا الهلال ويسقط النصر..
وشاطب على يسقط.. وكاتب ينجح النصر بمعدل مقبول….
اخوه نذل واثول,
يبي ينجح النصر بالغصب..
منشان يلطع بالبيت ولا يسجل بالجامعة..
كل هالكتابات مسطرة على براطم مجنونوه..
ما قلت لكم براطمه تقل صبورة.. لا وجاره العاشق كاتب,,
ذكريات الفاطس من الحب… يلعن ابو الحب لا صار من شنق واحد.
الخدود:-
عاد كيف اوصفها لكم,,خدوده مدغبسة ومتدلوسة..
ولانه دووبا, فانها ترج تقل دينة
رايحة فيها المقصات والاذرعة,,
وتتمايل خدوده تقل جلي .
لون خدوده يميل للاصفرار,
شكله مصاب بالصفار ,راحوا به اهله مرة للطبيب ,
ما حصل ورقة يكتب الوصفة
كتبها على براطمه..
بس يا خسارة, انمحت الكتابة,,.
العيون:-
عيونه تقل عيون هندي ماصل,,,
ماكلن شطة ومتبققة عيونه,
لونها فوشي
<--- ما يعرف الفوشي لون والا اكله.
الشنب:-
منفوش ومنكوش تقل رسمه بنقلاديشي يرسم منقلة
ولا عرف,, رسمته متعرجه .
وشنبه كث وكثيف
تقل شعر تشاديات منفوحة.
الشعر:-
فلافل وطمعية…
<--- جايع الاخ.
شعره مفلفل ومقرفط,
بس عاد اشقر..
اول مرة اشوف شعر اشقر ومفلفل..
الجنادرية قد اخذت مجنونوه يعرضوه
في معرض الغزل والنسيج,, عشان شعره,
لا وازيدكم من الشعر بيت سوبر ديلوكس..
اخته باذته كل يوم ساحبته بشوشته تبي
تطبق عليه دروس التدبير المنزل ( النسج والخياطة).
الاسنان:-
تقل كوينينات في عرضة سعودية..
منخورة ومسوسة.. وكلها تراقل تبي تطيح,
الثنايا ( السنين الامامية)
خاااشة على بعض ما فصل بينهن
الا المرور والدفاع المدني,
راح لطبيب الاسنان ما قدر يصلح شي له..
براطمه تحجب الرؤية.. فارسله لورشة سمكرة.
الاذاني :-
وش اقول..
وانت تناظرها تحسبها خريطة العالم العربي
من كبرها..
اخوووه ابو مناخر لومينا اس اس,
يستخدمها محاقين لبواري ططسنه الاربعة والثمانين..
اخووه متاثر بموضة القصمان ببواري الباخرة وطقتها..
واذا انمحل مجنونوه
وضاقت عليه الوسيعة من الحر,
استخدم اذانيه,,, ريشة تهويه..
لا ازيدكم من الشعر فلة ديبلوكس يستخدم
اذانيه كشمسية لسيارته البي,,
البي ما هي بي ام دبليوم..
ذي سيارة قديمة من نيسان,
لا تصدقوه يوم يقول ابوه شارين
له بي ام دبليو ترى يخف عليكم.
3-المواصفات العامة:-
اللقب: -
بوفية, سمي بذلك بسبب كبر مناخره,,
اول ما تشوفها تحسبها بوفيه فتحة وحدة..
خااااصة لا شفت الشاورررررماااااااا اللى فيهااا,
قصدي الدغابيس اللى بمناخره..
<--- افلقوه اذا واحد اكل شاووورما بعد ذا الوصف!.
المؤهلاات الدراسية:-
معه شهادة اولى متوسط ماخذها
من مدرسة منفوحة لمسح وكنس الامية.
معه شهادة حسن سيرة وسيرك,
اخذ شهرين بسيرك بالصومال كقرد بهلواني.
معه شهادة عدم تعرض ,, الولد خطير وواصل..
ما حدا قده,, شهادة عدم تعرض لانه يعاني من
انقسام الشخصية, شكله متاثر بالقسمة الطويلة والقسمة بباقي,,
فصار عنده انقسام في الشخصية من كثر ما يقسم ويحلف!
ومعه شهادة تطعيم ضد الحمى الديكية
والدجاجية والحمى الجيزانية( نسبة لحمى الوادي المتفضخ).
الوظيفة:-
وظيفته السابقة ماذون أنكحة,,
وجه شؤؤم كل اللى تزوجوا تحت يده وفوقها..
اصابهم صفار وبهاق وشهاق وطلااااااق,,,
واصابه عقد نفسية من كثر ما يعقد بالناس
والحين يعمل كمغني وفنان..
وبعد ما صار مشهور و كون له قاعدة مدري جالسة,
قاعدة جماهرية غير اسمه لاسم فني..
وصار اسمه.. طوني مطفوق فتح الدولاب..خخخ..
ذا اسم والا جملة فعلية…
شكله لاطش الجملة ذي,,
من إختبارات النحو والصرف الصحي,
يوم كان يدرس في مدرسة منفوحة لمسح وكنس الامية.

جاء دور... مدمن مصرقع..

مدمن مصرقع..

1-البطاقة الشخصية:-

الاسم: -

مدمن بن طرشي بن مصقع.
كان اسمه سابقاً
مدمن مطبق بالبيض واللحم.
شكل كل العائلة مولودين بمطعم
موب بمستشفى.

العمر:-
جاء للدنيا ولا كان عند ابوه تقويم يشوف
تاريخ ميلاده, بس مكتوب في شهادة ميلاده
جاء الساعة ثنتين من الليل. وشهادة ميلاده
مليانه بقع مايونيز وطرشي وزلطة..
وهذا دليل انه العائلة مولودين بمطعم,

الميلاد:-
مطعم مضرط خان البخاري بولاية عليشة الكبرى.
الطول:-
45 ,, الولد مستجحش ويقول:
ان طوله هو مقاس زبيرياته..
الوزن:-
يزن 4 بيذجانة وخمسة كيلو بطاطا
وصاعين دقيق,, وش نسوي,,
ما نقدر نوزنه الا بالاشياء اللى يفهم عليها,,
مدمن,, كل شي يتعلق بالمطبخ لازم يقيس عليه..
لو قلت له وش لون الشمس,
راح يقول لك مثل لون ليمون زهيري,
ولو قلت له وين اسواق المعيقلية ,,
قال شفت فوال عصويد قبالته الاسواق..
وترك المحكمة الكبرى وش كبرها,,
وراح يوصف لك على الفوال
تعرف الفوال الفلاني تعرف البوفية الفلانية.

2- المواصفات والمعايير القياسية ( مواصفات الخشة طرشي ابوشن) ( فول ابوشن):-
الانف:
شكل وهيئة الامر بالمعروووف خخخخخخخخ,
لاحسه مخه الهيئة من كثر ما يطاردوه بالاسواق.
شكل وهيئة خشمه باذينجانية,
خشمه, تقل صامولية محشية جبنه وعدس,,
<---- يحب الجبن بالعدس بصلصة الخيار…
ليس لخشمه ارنبة,, مثل مجنونوووه,,
له حرشية.عاااد حرشيه انفه صااادها
جيزاني يحسبها ارنب,,,
وش عرف الجيازنة بالارانب,,
صحيح اللى ما يعرف الصقر
يضرب بيته بوية اصرف له!
( ينعن ام الامثال) والله اصلح حكيم,,,او دختوووور,
تصدقون عاد حكيم احلى من دختوور,
شغالتي اللبنانية لا مرضت,
وقالت:- ابي اطلب لك حكيم,,,
قلت:- لهااااا لا اطلبي مصطفى قمررر,,
وجتني العافية وزيت مازولاااا داعسين,,
وطبت من الصخونة..
<---- يخاف من الدكتور.. من الابرة وانت الصااادق.
مناخر مدمنووه, ولا كراج سيارات..
من وسعها اقدر البق فيه
سيارتي الكاديلك الكونكووورد…
حشااا ما يعرف يأرنب..
<---- من شوي يقول معه سيكل ومشتري
لها كفرات ميشلان,, والحين كاديلك مرة وحدة,,, خخخ,
عاد مناخر اخووو مدمنووه ارحم اشوي,,
صغيره,, تقل صيني يبي يعطس,,
سلمت على اخووه ذات مبطيات,
( يعني بسته على خده) فطلع في براطمي
فالووع,, يعني شق وشرخ وطرطعان,,
عاد لو طلع هالشرخ براسي والا جبهتي كان احسن,,
اقلها اقدر انصب على شغالتي اللبنانية ,
واقول انا بطل مثل عنترة بن شداد مدري سلوم حداد,
مدري والله من فيهم البطل,,
ما لاحظتوووا,, اني اكثر من ذكر شغالتي اللبنانية..
<--- يذكرها لكم يبيكم تسالوه
من هي شغالتكم.. اصلها مشهورة.
دامكم ما سالتووا.. انا ابي اقول لكم..
شغالتي الشحرورة مدري الصنبورة..
عاد ودي اتميلح قدامها واصلح نفسي بطل,,,
واشبكها,,ما خليت ولا ( مشبك ) بالرياض
الا وشريته عشااان اقدر اشبكها بيه,,
ما قدرت,, حتى مساكات الغسيل شريتهااااا,,,
ما بقى الا اشري شبك غنمات,, واشبكها فيه,,,
وانا معها,,, واصير اسير الشبك الذهبي
مدري القفص الغنمي,,.

الجبهة:
جبهة مدمنووه عبارة عن جبهة على الحدود, يحاصرها ثلة من الجنود… طلعت عن الموضوع,,, خخخخخخ
<--- طلع يشم هواء ويرجع,,,
<--- يا حوووبه للسياسة,,ناوي يعقد قرانه عليها,
جبهة مدمنووه مقوسة ومعوجة ومقببة ومدببة
وملعونن طيف الاستقامة فيها
من كثر الكدمات والضربات..
شكل ابوه يستخدم قليلت وجبيهت مدمنووه
في عصد وعجن المطبق, , الصراحة ما اخفي عليكم,
لا بغيت اكل مكسرات لازم مدمنووه جنبي
جبهته تساعدني في كسر حبوب الفستق,
عاد عليه حاجبين مقوسة وش زينهااااااا,
بس الحاجب الايمن,, طايح..
يقولون والعهدة على الراوي ابو قطيوووة صفح الله عنه,
ان حاجبه الايمن فقد في حصة الرسم..
كان كاتب على الكراسة العين ما تعلى على الحاجب..
الهلال والنصر… ويبي يرسم حاجب راح واخلع حاجبه
من راسه وحطه تحت الورقةنشان يشفه,,,,خخخخ,
وش ترجي من مواليد مطعم مضرط خان البخاااري,.
البراطم:-
براطمه تشبه حلقة,,,, حلقة من أي مسلسل,,
--- مدوخته متابعة المسلسلات الرمضانية,
براطمه تشبه حلقة تحفيض القرااان,,, خخخخخخخ,
طبيت,, واكلت لي مطب,,
براطمه حلقة,, ذات حواف مدببة,
وكانها غطاء كوكا كولاااا,
والبرطم السفلي, غليظ وحلزوني وكانه لي وايت,
والبريطم العلوي عريض ومتنفخ تقل عجينة كثيرن خميرتها.. خخخخخ.
ينعن ام الكلمات الرنانة والطنانة..خخخخ,
طلعت نحلة موب كلمااات,,
لحظة.. لحظة .. لحظة,,
<---- يبي يقول عجينة كثيرن خميرتهاااا,,,
يبي يشوف نفسه احسن من الشاعر خالد الطبيشي..
مدري خامر المريخي.
ينعن ام الكلمات,,لا تصلح مطلع معلقة مدري مربطة,
احسن من معلقة زهير بن ابي ستو فريال.
الخدود:-
وووووووووااااوو.. على مدمنووه خدود..
تطيح البناااات,, وتهبل فيهن.. من نعومتهن….
كل دايم البناااات يحسدن شغالة مدمنوووه,,
<--- يبي يقول لكم سر.. شغالة مدمنووه اندنوسية
ولاهيب بحلووة مثل شغالتي اللبنانية صنبورة,,,
لاني انا شااايفها يوم استقدمناها من بنغلادش,,
<--- ما قصده يقول لكم ان عنده مكتب استقدااام,,
حشاااا ذا موب نصب الا هرش,,
اندونيسية مستقدمينها من بنغلادش.,,
عاد كل دايم البنااات يحسدن شغالة مدمنووه ماجي,, خخخ,,
مرقة الدجاج ماااجي,,
ما قلت لكم العائلة مولوده بمطعم حتى شغالتهم,,
باسم اكله,,
يحسدن البنات الشغالة ماجي,,
على خدود مدمنووه لانها تستخدمها كاسفنجة غسيل,,
خدود مدمنووه, قويتن على الدهوون لطيفتن على اليدين…
اصلح موديل اعلانااااات,,, انا وخشتي!..@_@
العيون:-
عيون مدمنووه تقل,, كورة تنس منسمه,,
الواحدة منهن لافه في جهه, ولا طباين ( ضرتين)
توهن متهاوشاات وطاقهن زوجهن..
لون عيونه,, والله ما اعرف اوصف لونها,,,
لكم,, بس اسمعو مني,, اكيد قد شفتووا التفاح,, صح,,
خلوا التفاح الحين,,اكيد قد شفتوا البرتقال,, ابو صرة,,
يا حلوه حلووووواه,,,, اتركووه,,
<--- يذكركم بالفواكة يبي يغث الصائمين ويجوعهم,, خخخخ,,
نذل.
لون عيونه تقل بيذجانه توها مراهقة
ولا بلغت يعني لونها لاهو اسود ولا اخضر, مخلووووط,,
( مخلووووط عوود والا بخووور ههههه),,
وش رايكم وصفي حلوووو, تعتقدوون اصلح معلق,,
انا كل دايم اعلق ثياااب في الدولاااااب صح,,
قسم اصلح اعلق على مبارة الهلااال والنصر,,
الا ملاحظتوووووا,,
اني من اليوم اجيب سيرة النصر والهلال,
ابيكم تسلؤني,,, وش تشجع,,,
يلله اسلؤني,,, وش اشجع؟
والا قسمن ما اكمل لكم الموضوع,,
يلله اسالووووا..
انا اشجع الدفاااااع,,
وش ذا فريق والا وش..!!
<--- ما يدري وين الله مغدية بالكورررة, يصلح يطرد كور,
الا عااااد الصدز,,, انا اشجع الاقلاااااع عن التدخين
<--- ما كنه بدا يتفلسف!,,,
الشنب:
في الوقت الحالي ليس لديه شنب,,
يقال والعهدة على الراوي ابو قطيوه صفح الله عنه,
ان شنب مدمنووه هجر خشته العظيمة.
بعد القحط الذي لحق به اثر امتناع مدمنووه
عن غسيل وجهه مما جعل القمل
يحتل الضفة الغربية من شنبه..
مدمنووه ما كني خشيت بالسياسة..
وش رايك اعقد قراني بها وارتاح..
من التغزل فيها كل شوي,, وشويااات!.
الشعر:-
شعره ولا صووف نعجة صايبتها الحمى الجيزانية,,
اشهبن منتف ولا شعر ماما نور..
لا وفرحان فيه ,
كل شوي مصلح له فرد ومسدس,,
كل شوي مصلح له فرد واستشوار,,
وحركات نص كم,, وفنيلة علاااقي.
وصروال قطن.. ودشداشة.. طلعت ( فرقنااااا).
لو يطيع نصيحتي,, ويحرق فيه بشخط ابو نسر.. ابرك له.
لا حتى حلاقته خسااااارة واسراف,
الاسنان:-
تقل جيازنة لابسين وزراتهم المشكلة باخضر واصفر,,
وقاعدين يلقون السلام الملكي..
الا على طاري الالقااااء,,
اذكر مدمنووه القى كلمة في الطابور الصباحي
فلق مدير المدرسة..خخخخخ, والله يا شين الالقاء.
<--- قد صار له موقف في الالقاء,القى بنكته
فسقطت من براطمه وارتطمت بالبلاط
فتوفت باثر رجعي من الارتطام,
وسوا له قضية وتحقيق..
راعي سوابق.. اجل راعي غنمات!.
, ووحده من ثناياه( السنين الاماميين) طايحة..
وحااط سنة مذهبة تبرق وتلمع ولا وجه المذيعة ريما مكتبي
مدري ريما لاب توب..
الحكيم اللى صلح سنون مدمنووه..
<--- خخخخ الحكيم.. متاثر بشغالته اللبنانية.
يقولون انه توفى اكثر من مرة
( حشااا قطو موب مودماني)
من رايحة فم مدمنووه,
شكله يكثر من الثووم.
الاذاني:-
اذاني مدمنووه ولا صحووون فول..
دائرية ومصفحة..تقل ( قفه)
القفة صحون مصنوعة من سعف النخل… يصلحها اهل ضرما,,, خخخخخ
يا كرهي لاهل ضرمااااااا, مثل الحواطى,,
بس متلعوزين لاهم من البدو ولا الحظر…
الحظر والا الحذف.. متاثر بالمسنجر…
من كثر ما يحذف ويضيف
..يبي يتميلح قدام البنات..
عشااان ياخذن مسنجره ويضيفنه
..نهاية الموضوع اعطيكن اياااه..
لا تستعجلن يا مطفق..
اذاني مدمنووه مثل ما قلت مثل القفة..
ولا انمحل ولا لقى صحون..
حط اذانيه وكب فيها الفوول..
مدمنووه مدمن فوول وعدس..
ما تشووفون منتدى الدجة يعج بريحة الفووول..
شكله قلب المنتدى لمحل فول وتميس..!
3- المواصفات العامة:-
اللقب:
صاموليه جبن,, سمي بذلك
لان خشمه يشبه الصاموليه,,
وما يتقاطر من منخاريه يشبه الجبنة..
افلقوني اذا واحد اكل صامولي بالجبن
بعد ذا الوصف الرايق..خخخخ!.
المؤهلاااات:-
شهادة ضمان لثلاث سنواات..
حشاااا غسالة.. موب ادمي,,
شهادة اول روضة, من مدرسة البخاري الاهلية… خخخخ,
مدرسة البخاري والا البريااااااني,,
شكله خاااااشها من حبه للرز البخااري,
شهادة حسن… حسن والا حسنين….
شهادة حسن سيرة وسلوك من أبتدائية المستقبل,,,
شكلهم ما عطينه ذا الشهادة ترضية
بعد ما خيم في اولى ابتدائي
عشر سنوات مع الاشغال الشاقة.
وشهادة تطعيم من جنون البقر,,
شهادة ميلاااااد,,, شهادة الميلاااد ,, بازن بها,,
وحاطها بمحفضته,, كبطاقة هوية..
الولد ما معه بطاقة.. تووه ما طلع
ولا فيه امل,, امل ولا منى,,,
<--- كانه بدا يستخف دمه,,.
الوظيفة:-
الوظيفة السابقة لمدمنووه, جرسون,
وطرده صاحب المطعم,
لانه بهذل الزبائن مرة كابن عليهم الشاي
ومرة طايح على خشته بالاكل…
لا وازيدكم من الشعر باروكة…
الزبائن لا شافوه انسدت شهيتهم عن الاكل,,
انا اقول لو يستخدمون فلااااش ما انسدت شهيتهم,,
بس وش تقول ناس ما تعرف تحافظ على صحتها,
<--- يستخدم فلاااش قبل الاكل وبعده ,
ويفرش اسنانه بليفة,
الصحة طاقية لا يلبسها الا الصلعااان,
ذي حكمتي بالحياااة, عشاان كذا انا مهتم بصحتي,
وضيفة مدمنووه الحالية,
مزين وفني تجميل وسباكة
وتلييس في صالون ببيروت,
ينعن ام التطور مدمنووه,,
اقول وش خلى يديك تصير ناعمة..
من كثر ما تليس في بنات لبنان,,
<--- وده يعرف سر الخلطة السرية
اللى يصلحها لتلييس وجه ديانا حداد,
مدري ديانا لحام حديد,,
<-- يبي يصير حلوووو مثلها,
عاد مدمنوووه يوم صار مشهور
وكل جميلات الفن السابع,,
مدري الفن الماصل,,
يجينه يليسن وجيهن ويصفف شوشهن,,
غير اسمه,, عشانه صار مشهور
وسلطت عليه الاضواء واللمبات والكبووس.
غير اسمه الى: دمنه قرد احي ,,, والله قرد من جد…. .

بريتي
البطاقة الشخصية:-
الاسم:-
بريتي بنت.. اجل ولد,,,
بريتي بنت شلفنطح الشفنطحاتش,

أسمها يبيله, إعادة ترميم,,
متأثر باحاديث المقاولين,,
ترى ثوبه مكوي موب مثلهم,,
مليان خلطات اسمنتيه,,.
العمر:-
تقول امها ان بريتي جات سنة
فلونة تروح للمدينة وتترك جدها,,
ويقعد بيتر يبكي عليها.
<--- حاقدن على بيتر, الولد يحب فلونا.
<--- كان يغطي التلفزيون بثوبه
المشقوق,
عشان اخوانه ما يشوفوا فلونا,
وهي على المرجيحة, يوم يطير ثوبها
عن سويقاتها,, الولد يغار,
ينعن ام الغيرة,

الميلاد:-
جات بقصر افراح بولاية عليشة الصغرى,
البنت سمعت الطيران,
استنزلت,,
حبكت معها لا تنزل في ذا الوقت,
ينعن ام الاحراج امها راحت فيها.
الطول:-
ثلاث اشبار فوق المية,
البنت ما تقيس لا بالصانتي ولا بالكيلو,,
مسوية فيها مقاطعة.. مقاطعة والا ولاية,,
مسوية مقاطعة للمنتجات الامريكية,,
لو تلعب كلمات متقاعطة مدري متقاطعة اصرف لها.
الوزن:-
اثنين فهد الحيان وثلاث ارباع,
يعني فهد الحيان ضرب 2وثلاث ارباع,
ضرب والا رفس ما يهم,
ما قدرنا نوزنها الا كذا,
ما تبي الوزن بالكيلو يأثر على بشرتها,
وبعدين هي مسوية مقاطعة,.
المواصفات والمعايير القياسية ( مواصفات فول ابوشن):-
الانف:-
قطوي الشكل,
ينعن ام التشبيه,
يعني تطالع بخشمها كنك تطالع بخشم
القطو مشاكس,,, اللى بهذل كعبول,
لها اخو, كانه كعبول, اقول لكم سالفته
بعدين.
انفها افطس وراعن, كل يوم لون,
حشاااا ما بذا بخشم, حربايه طلع.
مرة احمر ومره زهري,ومرة برتكاني
خشمها عاد الله يستر علينا وعليه,
راح فيها,
لان ابوقطيوة صفح الله عنه, قال لي:-
ان بوه بدوي شاف خشمها بتره من
قاعته, يحسبه ضب,
ذا البدوي شكله كان خرمان ضبان ساعتها.
مناخرها, صغيره تقل شمعات خديجة( كورولا) مكسرة,
مناخر خشم اخوها (كعبول)
اشوى منها شوي كانها,
فتحة علبة الميراندا.
سلمت على اخوها ( حبيته على خده),
وبادلني التحية بمثلها,, خخخخ كثر منها,,
بدل ما يحبني ( قرط) بخشمي,
عض خشمي يعني.
عاد لو عض برطمي التحتي, اصرف لي,
عشان ما اصلح عملية تصغير براطم,
<--- وده ان براطمه مثل براطم
عبد...الله بال هير,,, مدري عبد... الله بلخير,
الجبهة:-
جبهة بريتي,قمة
قمة الدول العربية, والا قمة شرم الشيخ..
<--- يا حبني للسياسة, يلمح لكم يبي وحدن يخطبها له !.
جبهتها قمة في مواصفاتها.
في يمين الجبهة تقبع شامة مترامية الاطراف والارجل,
تقل بحيرة الحائر,,
بحيرة الحائر بالرياض,,
<--- حاقد على وزارة المعارف
طول عمره يدرس بالجغرافيا ان المملكة ارض جدباء
وحدباء , وهم ينصبون عليه,
ما كثر الله البحيرات الا بالرياض.
بحيرة الحاير وبحيرة وادي لبن,, خل عنك بحيرات
الصرف الصحي على طريق الخرج والدمام,
<--- طلع من الموضوع,, ما راح يشم هواء,,
راح يعمر,,, يعمر بيت موب يعمر سيجارة
عاااااش مصرف,, خايف اخوه يقرا الموضوع
ويطقه طقن مبرح. وينزل ببطنه عرضة جيزانية.
احسن ما في العرض الجنوبية,
انك تعيث ببطن اللى حاقد عليه
عفس ورفس وردس,,
وتقول له انك جيزاني في حالة استنزال,
جبهتها تقع بها شامة كبيرة, عاد لونها
بني,شامة بنية,,, ما قلت لكم جبهتها قمة.
حاجبيها,, ينعن ام اللغة,
حاجبيها,,كاملين موب مثل اخواننا في الله اللى قبل,
حاجبيها تقل حرف الف
لا رسمها اخوي الصغير بقلم رصاص,
البنت لاعبه بحجانها تنميص وترصيص
وتغفيص الين صارت كذا,
لو تودي حجانها لدواجن فقيه
يصلحوا له تسمين حواجب ابرك لها,,
البراطم:-
براطم بريتي,
وخاصة البرطم التحتي,,
شي,, وش اقول,, وش اخلي,
تقل بيبان بيتنا منفوحة, واحد طايح
واحد شوي ويبي يطيح,
فمها اربع وعشرين ساعة فاتح,
مدري وين الهيئة عنها,
حتى وقت الصلاة ما تسكره,
جيت مرة, اصرف دراهم من الصراف
لقيتها قدامي , تدور مكافاة الجامعة
كفت,,, الصراف في فمها حسبتها
الصرافة.. موب هي دوووبا,, مدرمحة
ومدرجمه تقل اسطوانة غاااز,
كفت بطاقة الصراف في ثمها,
وكادت ان تموت البنت,
وسوت لي الشرطة قضية شروع في القتل,,
قضية ولا قضية الشرق الاثول,,
ياهووووو, ردينا لطير يللي,, السياسة وراي وراي..
العيون:-
عيونها اصغر من عيون مجنونوه,, كور بلياردو
ولونها.. تقل لون عيون صومالي
جايه امساك وعسر هضم,,
اصفر على اسود,,
شكل امها متوحمة على فنيلة عبدالله غراب,,
وطلعت عيون بنتها اتحادية.
الشنب:-
شنب على بنت.. ما تصير..
حول هذة النقطة اختلف العلماء والمفسرين..
وهناك عدد من التفسيرات:
الاولى:-
أن شنبها جاء ليغطي المسافة بين خشمها (السمول واجد),
<--- عنده لغة عنقليزية,
وبين برطمها المتهدل الطويل..
وهذة المسافة اللى تقل ملعب استاد الملك فهد.
<--- ياشر لكم يبيكم توقفون لطويل العمر ..
(صفط على جنب للملك وفه التبجيل كاد الملوك ان يكونوا.. شيــ...)
<--- ما يبي يكمل خايف على لسانه,
( لسانك جحشك ان عيطته تبن ركبك وان جحدته رفسك),,
ومنشان كذا جاء الشنب ليغطي هذة المسافة,,
حاطينه لمكافحة التصحر,, يا كثر المكافحات عندنا
مكافحة التصحر والتسول,, لو يحطون مكافحة الصراصير,
تكمل الرصة,,
الثانية:-
وهي الارجح, ان الشنب
هو لمدمن مصرقع, بعد ما هجر مدمنووه
بسبب القحط,
وقسم ذا الشنب محظوظ,
اقلها البنت, ما تذبحه بالتمليس,والتفتيل,
حنا يا الشباب. مثل حكم قراقوش,
نازلين بشنبتنا تفتيل.. لا قال المدرس
لواحد قم وقف,, قام يفتل شنبه ويقول:-
هاااااااه, انت وش تقول!.
الشعر:-
شعر بريتي, تقل شعر قنفذ,
<--- لاتشرهون عليه,, يحسب للقنفذ شعر,
كل شعره تقل جنود شرطة ملحطين في التمام العسكري.
والا طوابير عواطليه مرتزين بالعاير ينتظرون
بملفاتهم التقديم على وظيفة.
الاسنان:-
قالوا.. اثنين قال صفوا,,
اسنانها,, ما غير الثنتين اللى قدام,,
تقل هنديين واقفين يبيعوا مساويك,
الاذاني:-
اذاني بريتي وش كبرها, تقل مضارب تنس,
وش مضارب,, اكبر..
من كبرها جوا بيسجلوها بكتاب
جينز مدري جينيس
ما شالها,, ما قلت لكم كباااار مررررة.
من كبرها, ما عاد تشيل بريتي حقيبة بيدها,
كل اغراضها تحطها باذانيها,
احمر البراطم, وعطر بف باف,,لزوم المغازلجية,
والمراية.. حتى علبة مكياج الصباح ومكياج المساء
وعلبة مكياج بعد العصر, وعلبة العدسات الملوعة
العدسات الخضر والحمر اللى يحطنها البنتوتات,
حتى اني مرة شفتها ببندة العزيزية,
بدون اذاني,
اذانيها كان ما خذها اخوها كعبول,
ما حصل سلة استغل اذانيها.
الحاجة ام الاختراع... ابوها والله مدري منو..
لا تقول انا,ابو الحاجة..اخرة شبابي
تبون تطلعوني ابو...
<--- يبي يصغر عمره منشان المعجبات,,
المواصفات العامة:-
اللقب:-
ما نيب بقايل,,
<--- خايف على نفسه من بريتي,,
بريتي,, جنرال,,
جنرال والله مدري بالمباحث والا بالاستخبالات العامة,
اخاف اقول لقبها,, تنكبني,,
لساني متبري مني, وسوالفي بالسياسة كثيرة,,
المؤهلات:-
شهادة الثانوية.. ماخذتها بالدف,,والا الطار,,
يا اخي, هي غبيه,, والا وش هو له الدف,
لو مخليه اخوها كعبول يصلح لها اشتراك
بسيارتهم الادوزمنبيل 75 كان اصرف لها,
وشهادة تطعيم ضد البروستاتا,
الدكاترة يقولون عندها بروستاتا
باذانيها سبب لها تضخم في الاذاني,
<--- افلقوه بجنط اذا نفعها التطعيم.
لا ومعها بعد.. شهادة.. قصدي تذكرة..
تذكرة دخول لجنجل لاند, بازتن فيها
منشان تحر فيها زميلاتها بالجامعة,
<--- افلقوه بمفتاح عجل والا عفريته
اذا هي والا هو شاف جنجل لاند,
نسمع عنها.
<--- يسمع ان جنجل لاند غالية,
ويدعي ربه أن منحه الارض تجي فيها
عشان يبيع المنحة..
الوظيفة:-
الوظيفة السابقة,, غسالة صحون ومواعين,
ببيت ابوها,
عاد يوم دشت الجامعة, تركت ذي الوظيفة
منشان تلتفت لدروسها,,
ما تلتفت وتخلصنا ما حدن مسك رقبتها ومنعها
من الالتفات,
وابرك لاهلها, انها تركت ذا الشغلة,
كانت بتموتهم كل شوي جايهم
تسمم, بسبب المواعين اللى ما تعرف تغسلها,
لا وارتاحوا من صياحها لادشت المطبخ
وشافت صرصور.
عاد هي يوم خشت الجامعة. غيرت اسمها,
منشان تظهر بمظهر البنت المثقفة المتعلمة...
وغيرت اسمها الى:-
منقلة بنت شلفنطح...
ينعن ام الخبال,, قلت الاسامي عندها,
ما لقت الا منقله,
يبيلها ضرب على راسها بمنقلة,,,

باي بااااااي,,,,
المنسم للابد.... عيون للابد..
... واللبقسة ان شاء الله في الطريق,,
المعاناه.. وحدة بايعتها.. ونص نص.. والبقية الباقية...

عيون للابد..

ههههههههههههههه

ღ مشكور اخوي ماكس على الموضوع الجمـــــيل ღ

» شوفو اش يصيـر في المداارس وقت التطعيم >> ههههههههه
» اكتب اسمك.. تطلع وجبتك المفضلة..